Nebliger Untergang der 2. Mannschaft

FC Niederstetten 2 – FC Bütschwil 2:8 (1:3)

📍 Rehwiese - 17.10.2021/ 11:00 Uhr

Tore: 0:1, 0:2, 0:3, F. Waldburger 1:3 1:4, 1:5, 1:6, 1:7, 1:8, A. Schlegel 2:8

Stette empfangt hütt de FC Bütschwil uf de Rehwiese zum letschte Spiel vo de Vorrundi. D’ Gäst us em Toggeburg startet druckvoll is Spiel und Stette isch emole mit verteitige beschäftigt. Es chund immer wieder zu heikle Situatione sowie zu gföhrliche Ballverlüscht vor em 16er vo Stette. Eso chunds au dass scho 2.5 Mönet vor Weihnachten Gschenk verteilt werdet und d’ Gäst s 0:1 schüsse chönd. Noch vorne chund relativ wenig bis nünt vom Heimteam. Aber s’grosse Gschenk verteile goht witter und Stette schloht sich wieder selber. 0:3 noch rund 30 Minute. Zwei Wechsel vo Niederstette bringet frische Wind is Spiel. Jetzt isch die best Spielphase wo zeiget wird und so schafft de F. Waldburger de Aschlusstreffer zum 3:1. Es isch aber no viel mehr drin gläge, denn plötzlich schwimmets i de Verteidigung vo Bütschwil. Doch d Ziit langet nümme zum no s‘zweite Goal schüsse vor de Pause.

Noch de Pause hend mir wölle a de letschte 15 Minute vo der erste Halbzit ahknüpfe, aber es chund alles ganz anders. Praktisch jede Angriff vo de Bütschwiler finded jetzt de Weg is Goal. Ohni grossi Gegewehr schüsseds inerhalb paar Minute 5 Goal. Es isch absolut unverständlichwa jetzt zeiget wird, kei Leidenschaft, kei Herz vom FCN. Stette chan erst ab de 60. Spielminute wieder einigermasse mit em Spiel mithebe und hett de Tritt wieder gfunde. S’Heimteam schafft ih de Schlussminute de „Aschlusstreffer“ vom A. Schlegel zum 2:8. Kurz spöter isch s’Spiel verbi und somit die enttüschendi Vorrundi.

Jetzt gots ab id Winterpause, wo no viel Arbeit wartet uf die 2. Mannschaft, sodass mer i de Rückrundi s’Feld vo hine chönd ufrolle. Nur 3 Pünkt us 8 Spiel isch nämli definitiv zuwenig!

Hopp Stette