3. Niederlage in Folge

S‘letschtä Heimspiel vo de Vorrundi positiv gestalte: Mit dere Ihstellig gohts hütt ...

FC Niederstetten 2 – SC Aadorf 2a 2:4 (1:2)

Rehwiese - 18.10.2020/10.30 Uhr

Tore: 8‘ 0:1, 15‘ 1:1 D.Stettler, 25‘ 1:2, 48‘ 1:3, 51’ 1:4, 90‘ 2:4 D. Stettler (P)

S‘letschtä Heimspiel vo de Vorrundi positiv gestalte: Mit dere Ihstellig gohts hütt gege de SC Aadorf. Üsse Stürmer goht drum ufs ganze und chan scho i de vierte Spielminute ellei uf de Goali laufe. De Goali chund usse gsprinntet und flext dä Dave um. Eigendlich eh klari Rotikarte, aber de Schiri gitt nur gelb. Dä ahschlüssendi Freistoss git nünd bruchbares druss. Die 8.Spielminute wird üsän Inneverteidiger nöd eso schnell vergesse. Bim Spielufbau spielt er ehn Pass genau am Gegner id‘Füess, dä nimmt das Gschenk gern ah und trifft zum 0:1. Stette mue jetzt reagiere und de Schock abhocke und sie machets au i de 15. Spielminute trifft üsi Nummer 10 zum 1:1 Usglich nochere schöne Einzelleistig. Im Spiel vo Stette klappt nöd eso viel zämme hütt, mer hend grossi Löcher im Mittelfeld und die eifache Bäll chömed nöd ah. Drum chönd d Aadorfer i de 25 Minute wieder in Füehrig goh. Us dumme Ballverlüst idä Vorwärtsbewegig entstönd immer wieder Chancene fürd Aadorfer. So isch de FCN froh als denn de Schiri zur Pause pifft und mer durrä schnuffe chönd.

De Match nomel drülle da isch jetzt üsses Ziel i de 2. Halbziit. Aber mer sind nonig parat im Chopf und immer de einti Schritt z‘spoot. So chund scho s 1:3 idä 48. Minute für de Gegner. Es passt würklich nünt zemme hütt und drumm chömet mir auno s 1:4 über. De Trainer bringt frischi Lütt und stellt achlis System um. Meh Schlagcharaft gege fürre und erhöhte Ballbsitz schloht drus usse, leider aber keis Goal. Ziit lauft langsam aber sicher ab, es werdet no paar Chartene verteilt und so isch scho die 90. Minute wo mer no en Handspenalty über chömmed. Mit vollerwucht schüsst de Dave zum 2:4 Endresultat ihne. Kurz druff isch s Spiel fertig und sletschte Heimspiel vo de Vorrundi isch Gschicht.

Am kommende Fritig stoht scho sletschte Spiel vo de Vorrundi a gege de FC Neckertal-Degersheim (20:00). Mir freuet üs wenn mir uf eui Unterstützig zehle chönd. En grosse Dank goht ah alli wo üs au im Johr 2020 unterstützt hend und immer so zahlrich erschiene sind uf de Rehwies. Au en grosse Dank goht an @mrmodestia für die geniale Fotiufnahme vom Spiel hütt gege de SC Aadorf.