Schwache Leistung gegen Ebnat-Kappel

FC Niederstetten 2 – FC Ebnat-Kappel 2 1:4 (1:3)

Rehwiese - 11.10.2020/10.30 Uhr

Tore: 12. D. Stettler, 20. 1:1, 23. 1:2, 43. 1:3, 60. 1:4

Vom Regä verschoont worde und bi bestem Sunneschii treffed mir dehai uf dä Tabelle-Nochbuur us Ebnat-Kappel. D Platzverhältniss sind sehr schlecht und dä Vorteil hend mer hütt voll und ganz wölle usnützä und somit s Spiel noch üsem Gunsto z gstalte. D Ebnater started besser id Partie inne und setzed üsi jung Verteidigung vo Beginn ah unter Druck. Entgegä vom Spielverlauf schüsst üs denn aber de Dave in Füehrig mit sim 6. Saisongoal im 6. Spiel — Top Quote. Leider chönd mir noch de Füehrig nöd nomel eh Schippe druff leggä und lönd am Gegner im Ahgriff viel zviel Platz für Schüss und gföhrlichi Flankene. Drus usse folgtet 2 Goal innerhalb 3 Minute fürd Ebnater. Etzt isches ade Ziit zum reagiere aber leider glingt üs das nöd. Churz vor de Pause mömmer sogar nos 3. Gegegoal hineh nocheme fehlerhafte Zuespiel idä Verteidigung.

Bide Besprechig ide Pause isch dem jede bewusst worde dasses nomel 45 Minute 120% vo jedem einzelne brucht wemmer no wönd Pünkt ihfahre ih dem Heimspiel.
Idä Offensive fehlts üs oft ah dä Durchschlagschraft und üsi wenige Ahgriff werdet scho vorem Abschluss jewiils gstoppt. Ih dä 60. Minute folgt denn scho s 4. Gegegoal nochere Flanke wo dä Ebnater Stürmer völlig frei stehend s Goal mache chan. Dä Kampf und Wille,  wo im letschte Spiel gege d Uzwiler no im Vordergrund gstande, isch wird hütt schmerzhaft vermisst. Üsän Goalie de Marcel verhindert schlimmers und krönt sini stark Leistig mit ehmä ghaltene Penalty idä 80. Minute.

Viel positivs chamer noch dem schlechte Spiel und verdiente Niederlag leider nöd mitneh. Eh grosses Dankeschön goht usse an Mr. Modestia für diä super professionelle Fotene vom Spiel. Trotzdem gilts etzt no Vollgas z geh i dä Trainings, sodass mir idä letschte 2 Spiel üs no vode beste Siite zeige chönd. Am Sunntig (10:30) folgt bereits wieder eh Heimspiel gegä dä SC Aadorf.

Hopp Stette