Heimsieg gegen Kirchberg

FC Niederstetten 2 – FC Kirchberg 2 3:2 (2:0)

Rehwiese - 27.09.2020 / 10.30 Uhr

Tore: 9. 1:0 D. Aubry, 45. 2:0 D. Stettler, 48. 2:1, 81. 3:1 D. Stettler, 87. 3:2

Amenä chalte Sunntigmorge treffed mir ide Rehwies unne uf dä FC Kirchberg. Mer started schwungvoll id Partie und gönd nocheme schöne Zuespiel vom Peter uf dä Aubry mit 1:0 in Füehrig. Danke ah dere Stell fürd Chiste Bier fürs 1. Goal für üsän FCN Aubry. Ide nöchste Minute chund Kirchberg besser is Spiel und hett 1-2 Chancene uf dä Usglich. Churz vor Pause gwünnt denn aber de Dave, üsän Torschütz vom Dienst, eh Laufduell und cha sich souverän durresetze und verwandelt iischalt zum wichtige 2:0 vorem Pausetee.

Diä 2. Halbziit started miteme strenge Penalty Entscheid zu Gunste vom FC Kirchberg. Ahschlüssend isch s Spiel sehr umkämpft mit vielne Fouls uf beidnä Siite. Dä Schiri bliibt sinnere Linie treu und loht viel laufe ohni gelbi Charte. Die einzig Charte vom Spiel chund dä Meier jr. über, und das sage und schreibe 1 Minute noch sinnere Ihwechslig.  Chapeau...

Idä 81. Minute schüsst dä Dave sis 2. Goal und stellt dä 2 Tor-Vorsprung wieder her.D Kirchberger gäbet aber nöd uf und schaffet no dä spoot Ahschlussträffer idä 87. Minute. Geg de Schluss mönd diä knapp 60 Zueschauer also nomel um dä Heimsieg biberä, es chund zu Chance uf beidnä Siite und isch ehn riesige Kampf.
Noch 95 Minute erfolgt dä Schlusspfiff vom Schiri und somit isch üsän 3. Sieg ih dere junge Saison Tatsach. Am Sunntig erwartet üs bereits s nöchste Spiel gege dä punktglichi FC Uzwil.