Umkämpftes Spiel im Necker

FC Neckertal-Degersheim 2 – FC Niederstetten 2 3:1 (1:1)

 Necker – 08.10.2021/20.00 Uhr

Tore: 29. 1:0, 36. 1:1, 79. 2:1, 81. 3:1

Für ehn Lacher vorem Spiel sorgt d Ufstellig usem 2020 vo Stette, wo ih dene knapp 12 Mönät dä Weg in Chübel im Garderobehüsli nonig gfunde hett. Scho isch s letschte Uswärtsspiel ahbroche i derä Hinrundi gege dä FC Neckertal Degersheim. D Neckertaler setzed üs bi dem Fluetlichtspiel ide erste 10 Minute sehr unter Druck und agiered wie erwartet mit hoche Bäll id Spitzi fürre. Ahschlüssend chömed mer aber besser is Spiel inne und chömed au zu Chance. Nocheme Konter vo Neckertal mue de Stetter Goalie aber leider zum erste mol de Ball usem Netz fische. S Gegegoal motiviert üs aber no meh zum wieder aktiver und konzentrierter z spiele und mer chömed nocheme lange Ball vom R. Knellwolf id Spitzi fürre zum Usglich dur dä R. Bruhin. Mer bliebet idä 40. Minute gad bide Freistöss dasmol mitem R. Gämperli, wo us 35 Meter ehn Knaller abloht, wo aber pariert wird vom Neckertaler Schlussmann.

Idä Pausebesprechig hemmer gmerkt dass do definitiv was dinne liit und mer hend an Schluss vode 1. Halbziit wölle ahchnöpfe. Diä 2. Halbziit isch nochher recht usgliche mit Chance uf beidne Siite. Üsi Ihwechslige hend wieder für frische Wind ide Offensive und für Gfahr gsorget vorem Neckertaler Goal. Dä wichtig Füehrigstreffer zum 2:1 glingt aber denne leider dä Neckertaler ide 79. Minute und kai 2 Minute spöter wird dä Marcel T. per Penalty bezwunge. Somit isch s Spiel nun entschiede und s einzig spannende isch no diä eint oder ander Nettigkeit, wo zwüsched de Spieler ustuscht wird.

Somit bliebet mer üf üsnä 3 Pünkt hocke und hend nurno 1 Möglichkeit ufe Besserig bim nöchste Heimspiel am Sunntig, 17.10.2021, 11:00 Uhr gegä dä FC Bütschwil 2.

Hopp Stettä!